Má gefa börnunum sínum peninga?
Björn Berg svarar spurningum lesenda Vísis
71 árs kona spyrr:
Má maður gefa börnunum sínum 2 milljónir og hvernig er það skattlagt?
Þetta er algeng spurning, en því miður eru þessi mál afar sérkennileg hér á landi. Ég vísa alltaf beint á endurskoðendur eða skattalögfræðinga þegar fólk hefur áhuga á að gefa börnunum sínum peningagjafir, enda er mikilvægt að vera réttu megin við lögin og það getur verið snúið að átta sig á hvar mörkin liggja.
Hvað má gefa mikið?
Í stuttu máli eru aðeins tækifærisgjafir skattfrjálsar hér á landi. Enginn virðist þó vita hve dýrar þær mega vera eða hve háar fjárhæðir foreldrar mega gefa börnunum sínum. Auðvitað er verulega óþægilegt að fá ekki að vita nákvæmlega hvað skattayfirvöld telja tækifærisgjöf, en þannig er þetta nú.
Þetta veldur því að um samfélagið læðist hvísluleikur þar sem fólk segist hafa heyrt allar mögulegar fjárhæðir og eins og svo oft áður verður kaffistofan stórhættuleg, ætli fólk að sækja sér ábyrgar upplýsingar þangað.
Hvernig er gjöfin skattlögð?
Þú nefnir tvær milljónir króna. Ef við gefum okkur að skatturinn telji það of ríflega tækifærisgjöf verða börnin rukkuð um tekjuskatt og útsvar, sem getur verið svimandi hátt hlutfall, eða allt að 46,29%.
Tekur því að spara á verðtryggðri bók?
64 ára karlmaður spyr hvort hægt sé að hagnast á verðtryggðri bankabók þegar skattur er dreginn af nafnávöxtun
Því er yfirleitt bent á fyrirframgreiddan arf, en þér er velkomið að gefa börnunum þínum peninga með þeim hætti, ef greiddur er 10% erfðafjárskattur. Ágætt er að hafa í huga að við fyrirframgreiðslu gilda ekki þau skattfrelsismörk sem fylgja uppgjöri dánarbús, en það er þó skárra að ríkið hirði 10% en nær helming gjafarinnar. Á fáum gjafapökkum stendur nefnilega „Frá mömmu til elsku Evu minnar og Daða fjármálaráðherra“.
Góðar upplýsingar um fyrirframgreiddan arf má nálgast hér. Einnig er gott að leita til lögmanna eða annarra sem sérhæfa sig í erfðamálum.
Hvers vegna má ekki gefa peningana sína?
Erfitt er að átta sig á því hvers vegna foreldrum er gert svo dýrt að aðstoða börnin sína, hvert svo sem tilefnið kann að vera. Svona er þetta ekki í löndunum í kringum okkur. Norðmenn greiða engan skatt af peningagjöfum, frekar en í Svíþjóð. Í Danmörku má hvert foreldri færa hverju barni sínu allt að eina og hálfa milljón króna á ári án skatts og í Finnlandi má hvert barn fá um 1,1 milljón króna frá foreldrum sínum á þriggja ára fresti. Hærri fjárhæðir kosta 8% skatt (í stað allt að 46,29% hér).
Námskeið fyrir hópa - Lífeyrismál á öllum aldri
Bókaðu námskeið fyrir fyrirlestur fyrir þinn hóp.
Í Bandaríkjunum má einstaklingur fá um 2,4 milljónir króna á ári í gjöf, en þar eru ævilöng skattfrelsismörk svo há að fæstir verða nokkru sinni skattlagðir vegna gjafa.
Farðu varlega
Ég er ekki sérfræðingur í skattamálum en hef rætt við nógu marga endurskoðendur og lögmenn til að átta mig á hve mikilvægt það er að fólk í þinni stöðu vandi sig.
Ráðfærðu þig endilega við reyndan sérfræðing sem sér til þess að allt sé gert með réttum og löglegum hætti.
