Ertu með 60+ reikning? Svona færðu hærri vexti

Samkeppni um innlán er þónokkur og því fer fjarri að allar innlánastofnanir bjóði okkur sömu kjörin. Við getum þó ekki gengið að því sem vísu að vera látin vita þegar eitthvað betra býðst. Þegar vextir eru á mikilli hreyfingu, eins og þessi dægrin, er því gott að fylgjast vel með og ganga úr skugga um að við ávöxtum fé okkar sem best.

Eins og fram kom í greininni 60+ reikningar bankanna eru ekki alltaf bestir hafa nokkrar breytingar orðið á innlánaframboði bankanna og oft hægt að gera betur en að geyma sparnaðinn á gömlu góðu 60+ reikningunum.

Eru hærri vextir í boði?

60 ára og eldri líta oft til sérstakra óverðtryggðra og óbundinna sparnaðarreikninga sem aðeins eru í boði fyrir þann aldurshóp (eða 50 og eldri hjá Arion). Lengi hefur það dugað svo tryggja megi nokkurri vissu ljómandi fína ávöxtun í samanburði við aðrar bankabækur.

Nú skulum við þó leyfa okkur að líta aðeins víðar og athuga hvort eitthvað betra sé í boði. Til þess skoðum við eftirtaldar tegundir reikninga:

• Reikninga fyrir 50/60 ára og eldri

• Aðra óbundna og óverðtryggða sparnaðarreikninga án fjárhæðatakmarkana

• Hæstu vexti fyrir 20 mkr. innstæðu

• Reikninga bundna í 12 mánuði

Athugið að vextir gætu hafa breyst frá því greinin var skrifuð og reynt var eftir fremsta megni að bera saman sambærilega reikninga. Villur gætu leynst í samantektinni og væri vel þegið að fá sendar ábendingar um slíkt. Um er að ræða ársvexti.

60 ára + 6,25% (Heiðursmerki)

Sparnaðarreikningur 7,29% (Ávöxtun)

20 mkr. 6,30% (Heiðursmerki 1. þrep)

12 mánaða binding 7,62% (Fastvaxtareikningur)

60 ára +

6,40% (Varðan 60)

Sparnaðarreikningur

7,39% (Markmið)

20 mkr.

6,50% (Vaxtareikningur)

12 mánaða binding

7,35% (Fastvaxtareikningur)

50 ára +

6,40% (Vöxtur 50+)

Sparnaðarreikningur

6,25% (Vöxtur óbundinn)

20 mkr.

6,55% (Vöxtur óbundinn 4. þrep)

12 mánaða binding

7,40% (Vöxtur fastir vextir)

60 ára +

3,25% (60+)

Sparnaðarreikningur

7,39% (Auður sparnaðarreikningur)

20 mkr.

7,39% (Auður sparnaðarreikningur)

12 mánaða binding

7,39% (Auður bundinn reikningur)

60 ára +

6,71% (Gullárareikningur Spar. Strandamanna)

Sparnaðarreikningur

6,27% (Vaxtaviðbót Sparisjóðs Strandamanna)

20 mkr.

6,80% (Vaxtaviðbót Sparisjóðs Strandamanna)

12 mánaða binding

Fannst ekki

60 ára +

Ekki til

Sparnaðarreikningur

6,85% (Sparibaukur)

20 mkr.

6,85% (Sparibaukur)

12 mánaða binding

Ekki til

Tap á reikningum fyrir eldri hópinn

Eins og sjá má gefur enginn þeirra reikninga sem ætlaðir eru fyrir 50 eða 60 ára og eldri hærri vexti en auðveldlega er hægt að sækja annars staðar. Þá hangir ekkert á spítunni. Einfalt er að hækka vextina þrátt fyrir að innstæðan verði áfram óverðtryggð, óbundin og óháð fjárhæð.

Tökum sem dæmi 10 milljónir króna sem nú liggja inni á reikningnum Heiðursmerki hjá Íslandsbanka. Vextir reikningsins yfir árið verða:

10.000.000 x 6,25% = 625.000 kr.

Á nokkrum sekúndum má færa fjárhæðina á Ávöxtun og hækka þá vextirnir:

10.000.000 x 7,29% = 729.000 kr.

Vextirnir hafa hækkað um 104.000 kr. og er vandfundið betra tímakaup.

Skipta vextirnir einir máli?

Það getur verið varasamt að bera aðeins saman þá vexti sem í boði eru. Sannarlega þarf að líta til aðgengis að peningunum, öryggi viðkomandi lánastofnunar, væntinga til vaxtaþróunar, þjónustu og annarra þátta (sjá í greininni Öryggi er verðmætt) . Dæmi um slíkt er að ef við höldum að vextir fari lækkandi, getur verið freistandi að geyma sparnað á fastvaxtareikningum, þótt mögulega megi fá aðeins hærri vexti í dag á óbundinni bók. Við höfum því slíkt í huga við samanburð á reikningum, rétt eins og vaxtaprósentuna sjálfa.

Gott er að bera saman vexti á samanburðarsíðu Aurbjargar en við fylgjumst einnig með tilkynningum frá fjármálastofnunum, einkum ef peningastefnunefnd Seðlabankans gerir breytingar á stýrivöxtum.

Eru 50/60+ reikningarnir þá búnir?

Stutta svarið er já. Þar sem hærri vextir bjóðast nú á öðrum reikningunum með sambærilega skilmála er erfitt að átta sig á tilverurétti 5o+ og 60+ reikninga í dag. Þeir hafa verið afar vinsælir undanfarin ár og áratugi og má því gera ráð fyrir að verulegar fjárhæðir megi sækja með því að hagræða sparnaðinum á betri reikninga.

Nánari upplýsingar um fjármál á lífeyrisaldri má nálgast með því að smella hér eða á myndina að neðan. Þar getur þú auk þess skráð þig á póstlista um lífeyrismál.