Góð ráð á ferðalögum

Ekki koma heim í mínus. Hér eru nokkur einföld ráð sem hjálpa þér við að passa upp á budduna á ferðlögum.

Greiðslur

• Í posa skaltu velja að greiða í gjaldmiðli þess lands sem þú ert í. Þá færðu líklega betra gengi

• Forðastu aðra hraðbanka en þá sem eru staðsettir utan á eða inni í útibúi stórs banka. Það munar um að spara kostnaðinn sem fylgir slíku

• Hugaðu að gengi og kostnaði sem fylgir notkun greiðslukorta á ferðalögum. Ertu með heppilegasta kortið?

• Láttu frysta kortið þitt um leið og eitthvað virðist bogið. Þú getur gert það í appinu þínu

• Greiðslur með síma og korti geta verið öruggari en kortagreiðslur

Öryggi á ferðalögum

• Kynntu þér vel og vandlega svik og glæpi sem algengir eru á áfangastaðnum

• Fáðu alltaf að vita verð á þjónustu fyrirfram, til dæmis í leigubílum og þegar keypt er þjónusta

• Kynntu þér hvort og hve mikið þjórfé tíðkast að greiða

• Ekki tengjast fríu þráðlausu neti á ferðamannastöðum

• Passaðu upp á að tveggja þátta auðkenning sé virk á viðkvæmustu stöðum

• Kynntu þér þær ferðatryggingar sem fylgja greiðslukortinu þínu

Neysla

• Safnaðu fyrir fríinu, alls ekki greiða fyrir það með greiðsludreifingu þegar heim er komið

• Skipulegðu þig vel og vandlega með löngum fyrirvara. Leitaðu tilboða á flugi, gistingu, skemmtun og samgöngum

• Skammtaðu þér neyslufé fyrir hvern dag. Hve miklu má verja í mat, skemmtanir og fleira?

• Nýttu reiðufé til daglegra útgjalda. Þá tekst þér betur að halda þig innan fjárhagsáætlunar

• Oft er mun ódýrara að snæða á veitingarstöðum í hádegi en á kvöldin. Kynntu þér slíkt, afslætti, happy hour verðlagningu og fleira sem tengist mat og drykk

Gerðu sem mest úr hverri krónu

Vandaðu þig sérstaklega vel við undirbúning ferðalagsins, svo þú fáir sem mest fyrir peningana, getir notið frísins áhyggjulaus og meira svigrúm verði fyrir fleiri ferðalög í framtíðinni.

Það skal ítrekað að við eigum ekki að líta á það sem valkost að dreifa kortagreiðslum þegar heim er komið. Við eigum að hafa það sem ófrávíkjanlega reglu að ekki sé farið í ferðalög sem við getum ekki staðgreitt. Ef þú getur það ekki skaltu sleppa ferðalaginu og fara síðar. Kostnaður við dreifingar er gríðarlegar hár, langan tíma getur tekið að greiða af slíkum lánum og ef við venjumst slíkri lántöku getum við dregið verulega úr lífsgæðum okkar til framtíðar.

Þegar ferðast er með börn og unglinga er mikilvægt að sýna gott fordæmi. Höfum í huga að ef börnin sjá foreldra sína meðhöndla peninga með óábyrgum og virðingarlausum hætti telja þau slíkt eðlilegt og verða líklegri til að gera sömu mistök sjálf.

Ef þú ert á leið úr landi eru engar afsakanir. Slepptu þessum leiðinlega Netflix þætti í kvöld og byrjaðu að skipuleggja þig. Það er algjört aukaatriði hvort þér leiðist það, þú getur skemmt þér í fríinu. Nú skulum við temja okkur vandaða og góða hagi í tengslum við ferðalög. Lágmörkum líkurnar á óhöppum og svikum, óhóflegri neyslu og svívirðilegum gjöldum, óvæntum viðbótarkostnaði og óhagstæðu gengi. Hugsaðu þér hvað við getum fengið margt skemmtilegt í staðinn.

Góða ferð!